ე კ ო ნ ო მ ი ს ტ ი
ივანე ჯავახიშვილის სახელობის თბილისის სახელმწიფო უნივერსიტეტის პაატა გუგუშვილის სახელობის ეკონომიკის ინსტიტუტის რეცენზირებადი, ბეჭდურ-ელექტრონული, საერთაშორისო სამეცნიერო-ანალიტიკური ჟურნალი |
|
|
ჟურნალი ნომერი 4 ∘
ლუკა ლაზვიაშვილი ∘
ინკლუზიური ეკონომიკური განვითარების მახასიათებლები საქართველოში რეზიუმე სტატიაში ახსნილია ინკლუზიური ეკონომიკური ზრდის რაობა, წარმოდგენილია მისი მიღწევის გზები და წახალისების საშუალებები, ინკლუზიურობის ერთ-ერთი მთავარი წინაღობის - შემოსავლების უთანაბრო განაწილები სგაანალიზება და საერთაშორისო ორგანიზაციების მიერ გაცემული რეკომენდაციები და მითითებები.ნაშრომის მთავარი მიზანია საქართველოს ეკონომიკის ინკლუზიური განვითარების დონის შეფასება ინკლუზიური განვითარების ინდექსის დეკომპოზიციის მეშვეობით. საკვანძო სიტყვები: ინკლუზიური ეკონომიკა, უთანაბრობა, ინკლუზიური განვითარების ინდექსი, მაკროეკონომიკური პოლიტიკა შესავალი მიუხედავად იმისა, რომ ეკონომიკური თვალსაზრისით ყველაზე მნიშვნელოვანი საკითხი ეკონომიკური ზრდის უზრუნველყოფაა, საერთო კეთილდღეობის ასამაღლებლად მხოლოდ ის საკმარისი არ არის. თანამედროვე მსოფლიოს ყოველთვის აწუხებდა და დღესაც აწუხებს უთანასწორობის, სიმდიდრისა და შემოსავლის უთანაბრო განაწილებისა და საზოგადოებრივი ჩართულობის პრობლემები. აღნიშნულიდან გამომდინარე, ინკლუზიური ეკონომიკური ზრდის ცნება ბოლო ათწლეულის განმავლობაში განსაკუთრებით აქტუალური გახდა. 2000-იანი წლების დასაწყისში გაერთიანებული ერების ორგანიზაციამ სხვადასხვა შეხვედრებსა თუ კონფერენციებზე წინ წამოსწია მსოფლიო სიღარიბის პრობლემა. მრავალწლიანი დისკუსიის შემდეგ, საერთაშორისო ორგანიზაციები მივიდნენ დასკვნამდე, რომ სიღარიბისა და უთანაბრობის ერთდროულად დასაძლევად საუკეთესო გზა არის არა გადანაწილების პირდაპირი ღონისძიებები, არამედ ინკლუზიური ზრდის პოლიტიკა. ინკლუზიურ ზრდაზე მკვეთრად აქცენტირება დაიწყო 2008 წლიდან, როცა მსოფლიო ბანკის მიერ შექმნილი Commission on Growth and Development (CGD)-ის მიერ გამოქვეყნდა რეპორტი - The Growth Report: Strategies for Sustained Growth and Inclusive Development [Alfredo Saad-Filho, 2010]. ინკლუზიური ეკონომიკური ზრდა ეკონომიკური თანამშრომლობისა და განვითარების ორგანიზაციის (OECD) განსაზღვრებით, ინკლუზიური ზრდა ქმნის შესაძლებლობებს მოსახლეობის ყველა სეგმენტისთვის და სამართლიანად ანაწილებს მთელ საზოგადოებაზე გაზრდილი კეთილდღეობის როგორც ფინანსურ, ისე არაფინანსურ დივიდენდებს. მსოფლიო ბანკის განსაზღვრებით, სიღარიბის სწრაფად და საფუძვლიანად შემცირება მოითხოვს ინკლუზიურ ზრდას, რაც მოსახლეობას საშუალებას აძლევს ჩართული იყვნენ ეკონომიკურ ზრდაში და სარგებელიც მიიღონ მისგან [Ianchovichina E., Lundstrom S.]. მაღალი ტემპით ეკონომიკური ზრდა აუცილებელია სიღარიბის მნიშვნელოვნად შესამცირებლად, მაგრამ მისი ეფექტი რომ გრძელვადიანი იყოს, ის უნდა მოიცავდეს ქვეყნის ეკონომიკის სხვადასხვა სექტორს და სამუშაო ძალის დიდ მოცულობას (მაღალი ჩართულობა). ინკლუზიური ზრდის ეს განმარტება ხაზს უსვამს მასში ეკონომიკური ზრდის მაკრო და მიკროდეტერმინანტების მნიშვნელოვნებას. მიკროგანზომილების არსებობა გამოიხატება სტრუქტურული ტრანსფორმაციის განხორციელებაში. ინკლუზიური ზრდა მოიცავს როგორც ეკონომიკური ზრდის ტემპს, ასევე მის ხარისხს, და მათ ძლიერ კორელაციას. ინკლუზიურობა, რაც გულისხმობს თანასწორობას და თანაბარ შესაძლებლობებს, არის აუცილებელად გასათვალისწინებელი ინგრედიენტი ეკონომიკური ზრდის სტრატეგიის წარმატებისთვის. თანაბარ შესაძლებლობებში ძირითადად მოიაზრება სხვადასხვა სახის ბაზრების, რესურსებისა და სახელმწიფოსგან სწორად რეგულირებული გარემოსა თუ სახელმწიფო სერვისების ხელმისაწვდომობა ფირმებისა და ადამიანების ფართო სპექტრისთვის. ინკლუზიური ზრდა მიმართულია გრძელვადიანი ეკონომიკური ზრდისკენ მაღალმწარმოებლურ დასაქმებაზე ფოკუსირებით და არა დაბალი ფენისთვის შემოსავლის პირდაპირი გადანაწილებით. მოკლევადიან პერიოდში დასაშვებია მთავრობის მიერ შემოსავლის განაწილების ღონისძიებების გატარებით ღარიბთა დახმარება, მაგრამ ეს ღონისძიებები გრძელვადიან ზრდას ნამდვილად ვერ უზრუნველყოფს. ინკლუზიური ეკონომიკური ზრდა ჰგავს ღარიბ ფენაზე გათვლილი ზრდის ცნებას (pro-poor growth), მაგრამ მათ შორის არის არსებითი განსხვავებები. თუ ეს უკანასკნელი გულისხმობს შემოსავლების პირდაპირი განაწილების სქემებს, ინკლუზიური ზრდა ორიენტირებულია მწარმოებლურობის ზრდისა და ახალი სამუშაო ადგილების შექმნისკენ. საბოლოოდ, ინკლუზიური ზრდა გულისხმობს ეკონომიკური ზრდის ტემპის მატებას და ეკონომიკის გაფართოებას ინვესტიციებისთვის თანაბარი, სამართლიანი გარემოს შექმნით და მაღალმწარმოებლურ სექტორებში დასაქმების შესაძლებლობების გაზრდით. პირდაპირი გადანაწილების ღონისძიებების მაგივრად მაღალმწარმოებლურ დასაქმებაზე ზრუნვა ნიშნავს, რომ ინკლუზიური ზრდა დამოკიდებულია თავისუფალ საბაზრო მექანიზმზე და მთავრობა თამაშობს მხოლოდ ხელისშემწყობ როლს. რობერტბარო[1] შემოსავლების უთანაბრო განაწილების შესახებ ინკლუზიური ეკონომიკური ზრდის მნიშვნელოვნებისა და მისი წახალისებისათვის საჭირო პოლიტიკის გატარების აუცილებლობაში დასარწმუნებლად გთავაზობთ ინკლუზიური განვითარების ერთ-ერთი მთავარი „მტრის“, შემოსავლების უთანაბრო განაწილების ანალიზს. ცნობილმა ეკონომისტმა რობერტ ბარომ 1999 წელს სცადა ეკონომეტრიკული ანალიზის დახმარებით გამოევლინა ურთიერთკავშირი უთანაბრობასა და ეკონომიკურ ზრდას შორის [Robert J. Barro, 1999]. ბარო თავის ნაშრომში აღნიშნავს, რომ მცირე რეგრესიული კავშირი უთანასწორობასა და ზრდის ტემპს და ინვესტიციებს შორის მართლაც არსებობს. უთანაბრობის არსებობა აფერხებს ეკონომიკურ ზრდას ღარიბ ქვეყნებში, ხოლო მდიდარ ქვეყნებში პირიქით, ხელს უწყობს მას. იქ, სადაც მშპ ერთ სულზე 2000 აშშ დოლარზე (1985 წლის დოლარები) ნაკლებია (გაითვალისწინეთ, რომ ბაროს ნაშრომი დაწერილია 1999 წელს, როცა მსოფლიო მშპ ერთ სულზე 8000$-მდე იყო), უთანაბრობის ზრდა აფერხებს ეკონომიკურ ზრდას, ხოლო სადაც 2000-ზე მეტია, იქ ეკონომიკური ზრდის წახალისებას იწვევს. ეს ნიშნავს, რომ ღარიბ ქვეყნებში გამართლებულია უთანაბრობასთან ბრძოლის პოლიტიკა ეკონომიკურ ზრდასთან კავშირში გატარდეს. მდიდარ ქვეყნებში კი გადანაწილების აქტიური პოლიტიკის გამართლებულობა დამოკიდებულია იმაზე, მეტი თანასწორობით მიღებული სარგებელი უფრო მეტი იქნება თუ ეკონომიკური ზრდის შემცირებით მიღებული ზიანი. ბარო ეხება კუზნეცის მრუდსაც[2], რომლის მიხედვითაც უთანაბრობა თავიდან იზრდება, შემდეგ კი მცირდება ეკონომიკური ზრდის პროცესში. იგი დადებითად აფასებს ამ დამოკიდებულებას და მას ემპირიულად სწორ მიგნებას უწოდებს. მიუხედავად იმისა, რომ კუზნეცის მრუდი არ ხსნის ქვეყნებს შორის და სხვადასხვა პერიოდში არსებულ უთანასწორობას, ის ფართოდ გამოყენებადია ერთ სულზე მშპ-ს ანალიზისას და ასევე კარგად აღწერს იმ დამოკიდებულებასაც, რომელიც ახალი ტექნოლოგიის დანერგვისას ჯერ უთანაბრობის ზრდით, შემდეგ კი შემცირებით გამოიხატება. კუზნეცის მრუდს ბარო დადებითად აფასებს 2008 წელს იმავე თემისადმი მიძღვნილ ნაშრომშიც [Robert J. Barro, 2008]. მისი თქმით, საერთაშორისო მონაცემების ანალიზი კვლავ აჩვენებს კუზნეცის მრუდის სისწორეს, 1960-იანი წლებიდან 2000-იანი წლების ჩათვლით ეს დამოკიდებულება არ შეცვლილა. ბაროს განხილული აქვს საერთაშორისო ვაჭრობის დონისა და უთანაბრობის კავშირიც. მისი მტკიცებით, საერთაშორისო გახსნილობა პირდაპირპროპორციულ კავშირშია უთანასწორობასთან, და ეს კავშირი სტაბილურია დროში. 1960-იან წლებთან შედარებით ბევრად გაზრდილი საერთაშორისო ვაჭრობა აისახა გაზრდილ უთანასწორობაში მსოფლიო მასშტაბით. ამ კავშირს აქვს ირიბი ხასიათიც: ვინადიან ვაჭრობის ზრდა ეკონომიკურ ზრდას იწვევს, ირიბად ეს უთანასწორობის შემცირებაზეც აისახება. ერთიანობაში, გაზრდილი მშპ ერთ სულზე ნიშნავს სიღარიბის შემცირებას, თუნდაც შემოსავლების უთანასწორობის ზრდასთან ერთად. საბოლოოდ ბარო აღნიშნავს ეკონომიკურ ზრდასა და უთანაბრობას შორის კვლავ იგივე დამოკიდებულების არსებობას, რაც მდიდარი და ღარიბი ქვეყნებისთვის განსხვავებაში გამოიხატებოდა. ის აღიარებს კონვერგენციის რეალურად არსებობასაც და ეკონომიკური ზრდის მთავარ ფაქტორებად ასახელებს მეტ საერთაშორისო გახსნილობას, ცხოვრების ხანგრძლივობის უკეთეს მოლოდინებს, სწორ კანონმდებლობას და დაბალ შობადობას. გთავაზობთ ბაროს მიერ წარმოდგენილ წერტილოვან დიაგრამებს. პირველ გრაფიკზე ცალ-ცალკეა წარმოდგენილი დაბალი და მაღალი მშპ-ს მქონე ქვეყნები. როგორც ხედავთ, რეგრესიის ხაზი შედარებით ღარიბი ქვეყნების შემთხვევაში უარყოფითი დახრილობით გამოირჩევა, რაც შემოსავლებში უთანაბრობასა და ეკონომიკურ ზრდას შორის უარყოფით კავშირს უსვამს ხაზს, ხოლო მდიდარი ქვეყნების შემთხვევაში მრუდი აღმავალია, თუმცა აქ კავშირი არც ისე მყარია. აღნიშნული ანალიზი გაკეთებულია 1999 წელს. მეორე გრაფიკი კი ასახავს 2008 წელს ბაროს მიერ გაკეთებულ იმავე ტიპის ანალიზს, ამ შემთხვევაში არ ხდება მდიდარი და ღარიბი ქვეყნების ცალ-ცალკე გამოყოფა და რეგრესიის ხაზი ერთიან დამოკიდებულებას ასახავს შემოსავლებში უთანაბრობასა და ეკონომიკურ ზრდას შორის. როგორც ხედავთ ამ შემთხვევაშიც მრუდი დაღმავალია. გრაფიკი 1
გრაფიკი 2 ინკლუზიური განვითარების ინდექსი და საქართველო თავდაპირველად გთავაზობთ რამდენიმე შენიშვნას, რომელსაც 2017 წლის იანვარში გამოქვეყნებული მსოფლიო ეკონომიკური ფორუმის რეპორტი მოიცავს [World Economic Forum, 2017,p. 9]:
მსოფლიო ეკონომიკური ფორუმის 2017 წლის იანვრის რეპორტის ინფორმაციით, საქართველო განვითარებად ქვეყნებს შორის, ინკლუზიური განვითარების ინდექსის მიხედვით 31-ე ადგილზე იმყოფება (ინკ. განვითარების ინდექსი: 4.09) და ბოლო 5 წლის ტრენდის მიხედვით სწრაფი ნაბიჯით მიიწევს განვითარებისკენ. შედარებისთვის, პირველ ადგილზე არის ლიტვა (4.73), მეორეზე კი – ჩვენი მეზობელი აზერბაიჯანი (4.73). ჩვენს პოზიციასთან ახლოს იმყოფება ისეთი ქვეყნები, როგორებიცაა ბრაზილია, მექსიკა, ნიკარაგუა, კოლუმბია და მოლდოვა. განვითარებულ ქვეყნებს შორის პირველ პოზიციაზე ნორვეგიაა. ამერიკის შეერთებული შტატები მხოლოდ 23-ე ადგილს იკავებს [World Economic Forum, 2017. pp. 61-85]. სანამ საქართველოს ინკლუზიური განვითარების მახასიათებლებს შევეხები, წარმოგიდგენთ სქემას, რომლის მიხედვითაც დგინდება ინკლუზიური განვითარების ინდექსი: თითოეულ მიმართულებაში ქვეყნის მდგომარეობის შედარებით ანალიზს შესაძლებელს ხდის 79 განვითარებადი ქვეყნის ზრდადობის მიხედვით დალაგება და შემდეგ მათი კვანტილებად დაყოფა. მაგალითად, თუ ქვეყანა ამა თუ იმ მაჩვენებლით პირველ კვანტილშია, ნიშნავს, რომ ის ქვეყნების საუკეთესო 20%-ს მიეკუთვნება ამ მაჩვენებლის მიხედვით, მეორე კვანტილი კი შედარებით ნაკლებად წარმატებულ 20%-ს მოიცავს და ასე შემდეგ მეხუთე კვანტილის ჩათვლით. აღსანიშნავია, რომ მსგავსად შედგენილი რეიტინგით ცალ-ცალკე განვიხილავთ როგორც ქვეყნის მახასიათებლების ფიქსირებულ რიცხვებს, ასევე მათ 5 წლიან ტრენდებსაც (სურვილისამებრ შეგიძლიათ ქვემოთ მოყვანილ ინფორმაციას გაეცნოთ მსოფლიო ეკონომიკური ფორუმის რეპორტის შესაბამის ქვეთავში) [World Economic Forum. 2017,pp. 61-85]. მსოფლიო ეკონომიკური ფორუმის ზემოთ აღნიშნული რეპორტის მიხედვით, ცალკე აღებული ეკონომიკური ზრდისა და განვითარების კუთხით საქართველო განვითარებად ქვეყნებს შორის 36-ეა. მშპ ერთ სულზე 4010$-ს შეადგენს და ამ მაჩვენებლით ქვეყნების მესამე კვანტილშია მოთავსებული. უკანასკნელი 5 წლის მშპ ერთ სულზე ზრდის ტრენდი კი 6.2%-იანი ზრდით ხასიათდება და ამ მაჩვენებლის მიხედვით პირველ კვანტილში ვიმყოფებით განვითარებადი ქვეყნების საუკეთესო 20%-ს შორის. საქართველოს ფინანსთა სამინისტროს პროგნოზით[3] 2019 წლიდან მშპ-ს ზრდის ტემპი 6% უნდა იყოს, რაც კიდევ უფრო გაზრდის მშპ-ს ერთ სულზეც და რეიტინგით, სავარაუდოდ, მეორე კვანტილში აღმოვჩნდებით. შრომის მწარმოებლურობა 16292$-ს შეადგენს და ამ მაჩვენებლით საქართველო ასევე მესამე კვანტილში იმყოფება. ბოლო 5 წლის შრომის მწარმოებლურობის ზრდის ტრენდი კი 4.5%-იანი ზრდის მაჩვენებელს აფიქსირებს, რის გამოც პირველ კვანტილში ვიმყოფებით. საქართველოში ჯანმრთელად ცხოვრების მოსალოდნელი ასაკი 66.4 წელია, რის მიხედვითაც მეორე კვანტილში ვიმყოფებით. ამ მაჩვენებლის 5 წლიანი ზრდის ტრენდი კი 2.4 ერთეულით ზრდას გვიჩვენებს და რეიტინგში მეორე კვანტილს მიეკუთვნება. დასაქმება მხოლოდ 56.6%-ია და შესაბამისად ამ მაჩვენებლით ბოლოს წინა, მეოთხე კვანტილში ვიმყოფებით. ტრენდი კი აქაც საკმაოდ სწრაფად მზარდი გვაქვს(3.1%) და პირველ კვანტილში ვიმყოფებით. ცალკე აღებული ეკონომიკისინკლუზიურობისკუთხითაც საქართველო 36-ე ადგილზე იმყოფება განვითარებად ქვეყნებს შორის. დაბეგვრის შემდგომი შემოსავლების ჯინის კოეფიციენტი საქართველოში 38.8-ს შეადგენს და ამ მაჩვენებლით მესამე კვანტილში ვიმყოფებით. უკანასკნელი 5 წლის განმავლობაში 5 ერთეულით კლების გამო კი ამ მაჩვენებლის ტრენდი რეიტინგით პირველ კვანტილშია. სიღარიბის დონე საქართველოში 25.3%-ს შეადგენს და მეოთხე, ბოლოს წინა კვანტილშია განთავსებული. ტრენდი აქაც პოზიტიური გვაქვს, ბოლო 5 წლის განმავლობაში სიღარიბის დონემ იკლო 13.3%-ით, რის გამოც ეს მაჩვენებელი პირველ კვანტილში იმყოფება. სიმდიდრის ჯინის კოეფიციენტი 75.0-ს შეადგენს და მესამე კვანტილშია მოხვედრილი. ამ შემთხვევაში ტრენდიც მესამე კვანტილშია უკანასკნელი 5 წლის განმავლობაში 7 ერთეულით ზრდის გამო. საშუალო შემოსავალი დღეში 5.1$-ს(PPP) შეადგენს და ეს მაჩვენებელი მესამე კვანტილში იმყოფება. ამ მაჩვენებლის ტრენდი ბოლო 5 წელიწადში 1.2 ერთეულიანი ზრდით გამოირჩა, რის გამოც რეიტინგით მეორე კვანტილშია განთავსებული. თაობათა შორისი ბალანსისა და მდგრადობის კუთხით საქართველო 21-ე ადგილს იკავებს განვითარებადი ქვეყნების რეიტინგში. დაბალანსებული წმინდა დანაზოგები, ანუ წმინდა დანაზოგების პროცენტული წილი მთლიან ეროვნულ პროდუქტში 9.9%-ს შეადგენს და ამ მაჩვენებლით მესამე კვანტილში ვიმყოფებით. ამ მაჩვენებლის ტრენდი 8.3%-იან ზრდას გვიჩვენებს და პირველ კვანტილს მიეკუთვნება. ნახშირბადის გამოყენების წილი მშპ-ს ერთ დოლარზე 82.7 კგ-ს შეადგენს და ამ მაჩვენებლით მესამე კვანტილში ვიმყოფებით. 5 წლიანი ტრენდით 14.5 ერთეულიანი კლების გამო კი აღნიშნული ტრენდი მეორე კვანტილშია. სახელმწიფო ვალის წილი მშპ-ში 41.5%-ს შეადგენს და ამ მაჩვენებლითაც მესამე კვანტილში ვართ. ბოლო 5 წლის განმავლობაში მხოლოდ 5%-იანი ზრდის გამო კი ამ მაჩვენებლის ტრენდი მეორე კვანტილშია მოხვედრილი. დამოკიდებულების დონე აღნიშნავს მთლიან მოსახლეობაში სამუშაო ძალის პროცენტულ წილს და ის საქართველოსთვის 45.7%-ს შეადგენს, რითიც მეორე კვანტილშია. ბოლო 5 წლის განმავლობაში მხოლოდ 0.1%-იანი ზრდის გამო კი ამ მაჩვენებლის ტრენდი ბოლოს წინა, მეოთხე კვანტილის მკვიდრია. შეჯამების სახით შეიძლება ითქვას, რომ ინკლუზიური განვითარების დონის მიმდინარე მაჩვენებლები საქართველოსთვის არცთუ ისე სახარბიელოა. განსაკუთრებით მძიმეა მდგომარეობა დასაქმებისა და სიღარიბის დონის მიმართულებით, რომელი მაჩვენებლებითაც ქვეყნების რეიტინგის მხოლოდ მეოთხე კვანტილში ვიმყოფებით. სხვა მაჩვენებლებთან შედარებით უკეთესია მდგომარეობა სიცოცხლის მოსალოდნელი ხანგრძლივობისა და სამუშაო ასაკის მოსახლეობაზე დამოკიდებულების დონის კუთხით. დანარჩენი მაჩვენებლები რეიტინგით მესამე კვანტილში იმყოფება, მესამე კვანტილი კი საშუალო რეიტინგს ნიშნავს და, თუ გავითვალისწინებთ, რომ რეიტინგი მხოლოდ განვითარებად ქვეყნებს მოიცავს, შედეგები არადამაკმაყოფილებელია. რადიკალურად განსხვავებული რეიტინგები გვაქვს 5 წლიანი ტრენდების მიხედვით. ზემოთ აღწერილი 12 მაჩვენებლიდან 6 პირველ კვანტილშია მოხვედრილი, 4 მეორე კვანტილში, 1 მესამე კვანტილში და ერთიც მეოთხე კვანტილში. მესამე და მეოთხე კვანტილში მოხვედრილი ტრენდები სიმდიდრის განაწილებასა და სამუშაო ასაკის მოსახლეობაზე დამოკიდებულების დონეს ახასიათებს, რაც ნიშნავს, რომ ამ მიმართულებებით ნაკლები წინსვლა გვაქვს. თუმცა, დანარჩენი მაჩვენებლები სწრაფად მზარდი ტრენდით ხასიათდება და ტრენდების რეიტინგში წამყვან პოზიციებსაც იკავებს. ინკლუზიური ეკონომიკური ზრდის მაკროეკონომიკური პოლიტიკა ინკლუზიური ეკონომიკური ზრდის მაკროეკონომიკური პოლიტიკა შესაძლოა რამდენიმე ძირითად მიმართულებად დავყოთ[4] [ე. ბერიძე,2017, 1, გვ. 62-81; de Mello, L. and M. A. Dutz (eds.),2012]:
საქართველო 2020[6] საქართველოს სოციალურ-ეკონომიკური განვითარების სტრატეგია „საქართველო 2020“ დამტკიცდა 2014 წლის 17 ივნისს და ის ინკლუზიური განვითარებისთვის მიმართულ მთელ რიგ ღონისძიებებს ითვალისწინებს. იმ დროისთვის არსებული ეკონომიკური ვითარება შემდეგნაირად შეფასდა: „გასული ათწლეულის ეკონომიკური პოლიტიკა წარმატებული იყო ინვესტიციების მოზიდვისა და მოკლევადიანი ეკონომიკური ზრდის ხელშეწყობის თვალსაზრისით, თუმცა, მან ვერ შექმნა საფუძველი საქართველოს ეკონომიკის კონკურენტუნარიანობის ამაღლებისა და გრძელვადიანი ეკონომიკური ზრდისათვის; ... ეკონომიკური ზრდის შედეგები არ აისახა საქართველოს მოსახლეობის დიდ ნაწილზე და ვერც მნიშვნელოვანი გავლენა მოახდინა უმუშევრობისა და სიღარიბის მაჩვენებლების შემცირებაზე“. აქედან გამომდინარე, დაისახა შემდეგი მიზნები: 1. უმუშევრობის შემცირება; 2. შრომისა და ცხოვრების პირობების გაუმჯობესება; 3. საბაზისო სოციალური დაცვის სისტემის ფორმირება; 4. ადამიანური კაპიტალის განვითარება. ეკონომიკის შემაფერხებელ მთავარ პრობლემებად დასახელდა (growth diagnostic method): 1. კერძო სექტორის დაბალი კონკურენტუნარიანობა; 2. არასათანადოდ განვითარებული ადამიანური კაპიტალი; 3. ფინანსურ რესურსებზე შეზღუდული ხელმისაწვდომობა. აქედან გამომდინარე, დაისახა შემდეგი პრიორიტეტები: 1. კერძო სექტორის კონკურენტუნარიანობა: საინვესტიციო და ბიზნესგარემოს გაუმჯობესება, ინოვაცია და ტექნოლოგიები, ექსპორტის ზრდის ხელშეწყობა, ინფრასტრუქტურის განვითარება და სატრანზიტო პოტენციალის მაქსიმალური გამოყენება. 2. ადამიანური კაპიტალის განვითარება: შრომის ბაზრის მოთხოვნებზე ორიენტირებული სამუშაო ძალის განვითარება, სოციალური უზრუნველყოფის სისტემის სრულყოფა, ხელმისაწვდომი და ხარისხიანი ჯანდაცვის უზრუნველყოფა. 3. ფინანსების ხელმისაწვდომობა: საინვესტიციო რესურსების მობილიზება, ფინანსური შუამავლობის განვითარების ხელშეწყობა. დასკვნა ინკლუზიური ეკონომიკური ზრდა დღესდღეობით ყველაზე მნიშვნელოვანი ეკონომიკური გამოწვევაა, განსაკუთრებით განვითარებადი ქვეყნებისთვის. რობერტ ბაროს ანალიზზე დაყრდნობით კარგად ჩანს ინკლუზიურობის ერთ-ერთი მთავარი ხელის შემშლელი ფაქტორის, შემოსავლების უთანაბრო განაწილების უარყოფითი გავლენა ეკონომიკურ ზრდასა და განვითარებადი ქვეყნების კეთილდღეობაზე. ინკლუზიური ზრდისთვის შემუშავებული ეკონომიკური პოლიტიკის მიმართულებები საუკეთესოდ მიესადაგება დაბალშემოსავლიანი მოსახლეობის დახმარების, ეკონომიკური აქტივობის გაზრდის და ქვეყნის მთლიანი, ყოვლისმომცველი კეთილდღეობის მიღწევის მიზნებს. საქართველოს პოზიცია განვითარებადი ქვეყნების რეიტინგში(31) პოზიტიურ მაჩვენებლად ვერ მიიჩნევა და ბევრ არსებულ პრობლემასაც უსვამს ხაზს, თუმცა დადებითი რეიტინგი 5 წლიან ტრენდებში, „საქართველო 2020“-ით დაგეგმილი ღონისძიებები და უკანასკნელი პერიოდის პოზიტიური ტენდენციები მომავლისადმი დადებით მოლოდინებს აღძრავს. გამოყენებული ლიტერატურა 1. ე. ბერიძე, 2017. ინკლუზიურობა: ეკონომიკური ზრდისა და განვითარების უმნიშვნელოვანესი ფაქტორი, ეკონომიკა და ბიზნესი, 1, გვ. 62-81. 2. საქართველოს მთავრობის დადგენილება N400, 2014 წლის 17 ივნისი, ქ. თბილისი, საქართველოს სოციალურ-ეკონომიკური განვითარების სტრატეგიის „საქართველო 2020“ დამტკიცებისა და მასთან დაკავშირებული ზოგიერთი ღონისძიების თაობაზე. 3. საქართველოს ფინანსთა სამინისტრო - საქართველოსმაკროეკონომიკურიგანვითარებადატენდენციები 2017, (www.mof.ge). 4. Alfredo Saad-Filho - Growth, Poverty and Inequality: From Washington Consensus to Inclusive Growth, November 2010, Economic & Social Affairs. 5. Robert J. Barro - Inequality and Growth in a Panel of Countries, June 1999. 6. Robert J. Barro - Inequality and GrowthRevisited, January 2008. 7. Economic Policy Reforms 2012 Going for Growth © OECD 2012 - Reducing income inequality while boosting economic growth: Can it be done? 8. Elena Ianchovichina, Susanna Lundstrom - Inclusive Growth Analytics, The World Bank. 9. de Mello, L. and M. A. Dutz (eds.) (2012) - Promoting Inclusive Growth: Challenges and Policies,OECD Publishing. 10. World Economic Forum - The Inclusive Growth and Development Report 2017 [1] რობერტჟოზეფბარო (დაბ. 1944) - ამერიკელი ეკონომისტი, ჰარვარდის უნივერსიტეტის პროფესორი, ნეოკლასიკოსი [2] საიმონკუზნეცი (1901-1985) - ბელორუსი წარმოშობის ამერიკელი ეკონომისტი, 1971 წლის ნობელის პრემიის ლაურეატი, ინსტიტუციონალისტი. [3] საქართველოს მაკროეკონომიკური განვითარება და ტენდენციები, საქართველოს ფინანსთა სამინისტრო 2017 (www.mof.ge) [4] Economic Policy Reforms 2012 Going for Growth © OECD 2012 - Reducing income inequality while boosting economic growth: Can it be done? [5] World Economic Forum - The Inclusive Growth and Development Report2017, p. 11 [6] საქართველოს მთავრობის დადგენილება N400, 2014 წლის 17 ივნისი, ქ. თბილისი, საქართველოს სოციალურ-ეკონომიკური განვითარების სტრატეგიის „საქართველო 2020“ დამტკიცებისა და მასთან დაკავშირებული ზოგიერთი ღონისძიების თაობაზე. |